Zubieta – SOS

Maiatzaren 27an udal hauteskundeez gain errauste plantari buruzko
erreferenduma egiteko eguna ere izan zen Zubietan. Herritarren %62k
eman zuen botoa, eta bozkatu zuten 243 pertsonetatik 242 kontra azaldu
zen. Kontsulta Zubietako Herri Batzarrak antolatu zuen. Albiste hori
"Berria" egunkariak titulu honekin bildu du:  "Zubietako
herritarrek errauste plantaren kontra eta alternatiben alde egin dute"
. Eta "Gara"k berriz honela: "Aplastante rechazo a la incineradora en
el referéndum de Zubieta" .

(gehiago…)

"El Diario Vasco" egunkariak txoko batean publikatu du, ostiraleko (maiatzak 25) edizioan: "Creado el consorcio entre mancomunidades"
izenburupean dioenez, atzo Gipuzkoako Foru Aldundiak eta
Mankomunitateek sortu zuten Gipuzkoako hondakinak kudeatuko dituen
Kontsortzioa. (Ikusi Gipuzkoako Foru Aldundiak proposatutako estatutuak: GFA
eta Debagoiena, Debabarrena, S. Markos, Saiseta, Urola-Erdia,
Urola-Kosta eta Tolosaldeko Mankomunitateen artean lankidetza
hitzarmena eta Kontsortzioaren estatutuak). Honen lehenbiziko lanak izango omen dira zabortegiak itxi
eta intzineradora antolatzea.
(gehiago…)

"El Pais" egunkariak "Pais Vasco" atalean artikulu interesgarri bat plazaratu du, "La incineradora, el tabú electoral"
tituluarekin, non argitzen baita Zubietako errauste-planta dela
Gipuzkoan udal hauteskundeotan alderdi politiko gehienek ikutu ere egin
nahi ez duten tabua. Politikari gehienek, eta batik bat Gipuzkoan
agintzeko aukera gehien dituztenek, ez dute aipatzen baina -kazetariak
argitzen duenez- ezin dute beren buruetatik kendu: Ezker Abertzale
maioritarioa -EAE-ANVren bidetik- Zubietak oso inguruan harrapatzen
dituen herri nagusietako udaletara itzuliko da berriro -Usurbil,
Lasarte-Oria, Urnieta eta Hernanira bidenabar- eta baliteke
horietakoren batean gobernua ere berak gidatzea. Ahaztu gabe
Donostialdeko beste herri handi batzuetan ere -Pasaia,
Orereta-Errenteria, Lezo, Oiartzun- berriro egongo dela udaletxeetan.
Zubieta Bizirik plataformako bi buruzagi zinegotzi izateko postuetan
aurkezten dira Usurbilgo EAE-ANVren zerrendan.
Kazetariak ez du ahaztu, bestalde, errauste-plantaren kontrako jarrera
nabarmena
azaldu duela kanpaina osoan Ezker Batua/Aralar koalizioak, eta talde
honetako Donostialdeko zerrendaburua erraustegiaren kontrako Arnasa
plataformako kide Mikel Izagirre dela. Kazetariak beste albiste baten
aurrerapena ere eskaintzen du:
Gipuzkoako Hiri Hondakinen kontsortzioa -egingo balitz Zubietako
erraustegia bere baitan hartuko lukeena- dagoenekoz osatuta egon behar
zuen, baina hauteskundeak pasa eta biharamonerako erreserbatu du
Diputazioak.

(gehiago…)

Txingudi Bizirik plataformak maiatzaren 10ean eskatu du alderdi
politikoek argitu dezatela nork bere jarrera inzineradoraren aurrean.
Hala publikatu du "El Diario Vasco" egunkariak "Txingudi Bizirik pide a los políticos que «aclaren» su postura sobre la incineradora" lerroburua daraman albistean.

Plataformaren bozeramale Pilar Barquin-ek deklaratu duenez, «hiru urte
daramatzagu Txingudiko erraustegiarekin jira eta buelta, eta azken aldi
honetan gaia itzali egin dela dirudi, herritarren mobilizazioengatik
eta batik bat hauteskundeak gainean ditugulako. Orain isilaldi batean
gaude, (Irungo) alkateak 'azterketa denbora' deitu duen horretan, baina
alkateak joan den astean garbi adierazi zuen oraindik ere proiektuak
aurrera darraiela". Barquinek galdera bat utzi du airean: "Maiatzeko
hauteskundeen ondoren ekingo ote diote errauste-planta eraikitzeari?".

Usurbil Bizirik plataformak mendi martxa antolatu du iganderako,
maiatzak 6. Frontoi atzetik irtengo da goizeko 9:00etan. Zubieta
Lantzen eta Lasarte-Oria bizirik plataformek mendi martxara joateko dei
egin dute. Hala, Lasarte-Oriatik ere beste zutabe bat aterako da
8:30tan, eta ordu erdi beranduago Zubietara iritsiko da. Leku batetik
zein bestetik irteten direnek Artzabaletarako bidea hartuko dute eta
bertan elkartuko dira. Erraustegiaren kokalekuraino igoko dira. Bertan
informazio gune bat egongo da. Eguerdirako, Andatza Eguna izanda,
Andatzara igoko dira. Albistea Usurbilgo Noaua aldizkariak jakinarazi du.

Apirilaren 27an Lasarte-Oriako udalak osoko bilkura ez-ohikoan
gaitzetsi egin du Zubietan errauste-planta eraikitzea. Hala ezagutarazi
du Gipuzkoako "El Diario Vasco" egunkariak "El Pleno aprobó el rechazo
a la incineradora de Zubieta" lerroburuarekin plazaratutako albisteak.
Herriko 13 zinegotzi azaldu ziren bileran, horietatik 9k eman zuten
errauste-plantaren kontrako botoa (PSE-EEko 8ek eta EB-IUko bakarrak)
eta EA-PNVko 4ak abstenitu egin ziren. Udalak hitz eman du bere indar
guztiz egingo duela lan errauste-plantaren kontra, eta eskatu die
Diputazioei eta hondakinak kudeatzen dituzten amankomunazgoei aztertu
ditzatela errausketaren kontrako koordinadorek aurkeztutako ikerketa eta alternatibak.
(gehiago…)